qarine zist mein the soKHta-jaani se pahle

qarīne ziist meñ the soḳhta-jānī se pahle

bahut ābād the ham ḳhāna-vīrānī se pahle

badalte mausamoñ ke saath ġham bhī aa.e lekin

ġhamoñ kī shaan alag thī is farāvānī se pahle

inhī ḳhush-zauq logoñ meñ bahut charche rahe haiñ

hamārī ḳhush-libāsī ke bhī uryānī se pahle

jo yār-e-mehrbāñ nālāñ hai ab merī talab se

use shikva thā merī tañg-dāmānī se pahle

baḌā zīrak bahut daanā tujhe ham jānte the

dil-e-nādāñ tirī is hashr-sāmānī se pahle

ye parda hai kisī shai kā vagarna ham ne yaaro

baḌe tūfāñ uThā.e haiñ tan-āsānī se pahle

yahāñ ik baaġh thā jis meñ chahakte the parinde

yahīñ is qarya-e-jāñ kī bayābānī se pahle

ye mahjūbī ye ḳhāmoshī hamesha se nahīñ hai

lab-e-goyā the ham bhī apnī hairānī se pahle

qarine zist mein the soKHta-jaani se pahle

bahut aabaad the hum KHana-virani se pahle

badalte mausamon ke sath gham bhi aae lekin

ghamon ki shan alag thi is farawani se pahle

inhi KHush-zauq logon mein bahut charche rahe hain

hamari KHush-libasi ke bhi uryani se pahle

jo yar-e-mehrban nalan hai ab meri talab se

use shikwa tha meri tang-damani se pahle

baDa zirak bahut dana tujhe hum jaante the

dil-e-nadan teri is hashr-samani se pahle

ye parda hai kisi shai ka wagarna hum ne yaro

baDe tufan uThae hain tan-asani se pahle

yahan ek bagh tha jis mein chahakte the parinde

yahin is qarya-e-jaan ki bayabani se pahle

ye mahjubi ye KHamoshi hamesha se nahin hai

lab-e-goya the hum bhi apni hairani se pahle