qarya-e-intizar mein umr ganwa ke aae hain

qarya-e-intizār meñ umr gañvā ke aa.e haiñ

ḳhāk-ba-sar is dasht meñ ḳhaak uḌā ke aa.e haiñ

yaad hai teġh-e-be-ruḳhī yaad hai nāvak-e-sitam

bazm se terī ahl-e-dil ranj uThā ke aa.e haiñ

jurm thī sair-e-gulistāñ jurm thā jalva-hā-e-gul

jabr ke bāvajūd ham gasht lagā ke aa.e haiñ

pahle bhī sar bahut kaTe pahle bhī ḳhuuñ bahut bahā

ab ke magar azaab ke daur balā ke aa.e haiñ

raat kā koī pahar hai tez havā kā qahr hai

ḳhauf-zada diloñ meñ sab harf duā ke aa.e haiñ

qarya-e-intizar mein umr ganwa ke aae hain

KHak-ba-sar is dasht mein KHak uDa ke aae hain

yaad hai tegh-e-be-ruKHi yaad hai nawak-e-sitam

bazm se teri ahl-e-dil ranj uTha ke aae hain

jurm thi sair-e-gulistan jurm tha jalwa-ha-e-gul

jabr ke bawajud hum gasht laga ke aae hain

pahle bhi sar bahut kaTe pahle bhi KHun bahut baha

ab ke magar azab ke daur bala ke aae hain

raat ka koi pahar hai tez hawa ka qahr hai

KHauf-zada dilon mein sab harf dua ke aae hain