qasida zulfon ka jis jagah par chhiDa hua hai

qasīda zulfoñ kā jis jagah par chhiḌā huā hai

vahāñ pe ḳhushbū kā shāmiyāna lagā huā hai

darīcha-e-shab se jhāñktā hai ye chāñd kis ko

ye kaun bām-e-jamāl par rūnumā huā hai

na jaane us kā charāġh hai kyoñ bujhā bujhā sā

na jaane us ke shikoh-e-naḳhvat ko kyā huā hai

koī ta.alluq koī to rishta zarūr hogā

ye āsmāñ jo zamīñ kī jānib jhukā huā hai

batā rahī hai ḳhirām-e-bād-e-sabā kī mastī

gulāb shāḳh-e-adā pe koī khilā huā hai

use muravvat ke ḳhāl-o-ḳhad kyā dikhā.ī deñge

ġhubār-e-nafrat se shīsha-e-dil aTā huā hai

agarche sab khiḌkiyāñ haiñ barsoñ se band lekin

makān merā makāñ se us ke milā huā hai

ḳhayāl jin kā na ho ke guzrā kisī ke dil se

hamārā un sā.atoñ se bhī sāmnā huā hai

bahāreñ aa aa ke 'nūr' hoñToñ ko chūmtī haiñ

miyān-e-sahrā ye kaun naġhma-sarā huā hai

qasida zulfon ka jis jagah par chhiDa hua hai

wahan pe KHushbu ka shamiyana laga hua hai

daricha-e-shab se jhankta hai ye chand kis ko

ye kaun baam-e-jamal par runuma hua hai

na jaane us ka charagh hai kyon bujha bujha sa

na jaane us ke shikoh-e-naKHwat ko kya hua hai

koi talluq koi to rishta zarur hoga

ye aasman jo zamin ki jaanib jhuka hua hai

bata rahi hai KHiram-e-baad-e-saba ki masti

gulab shaKH-e-ada pe koi khila hua hai

use murawwat ke KHal-o-KHad kya dikhai denge

ghubar-e-nafrat se shisha-e-dil aTa hua hai

agarche sab khiDkiyan hain barson se band lekin

makan mera makan se us ke mila hua hai

KHayal jin ka na ho ke guzra kisi ke dil se

hamara un saaton se bhi samna hua hai

bahaaren aa aa ke 'nur' honTon ko chumti hain

miyan-e-sahra ye kaun naghma-sara hua hai