qatra-e-ashk se taskin-e-jigar ki ummid

qatra-e-ashk se taskīn-e-jigar kī ummīd

qulzum-e-chashm se hai āb-e-guhar kī ummīd

ġham meñ hotī hai ajab-ḳhez bashar kī ummīd

dard-e-jāñ-kāh-e-firāq aur sahar kī ummīd

qatl ko us ne pas-az-umr nikālī talvār

baad muddat ke bar aa.ī mire sar kī ummīd

nazar aatā hai bayābāñ se adam ko jaanā

ḳhaak ho dard-e-junūñ meñ mujhe ghar kī ummīd

us ne dekhā na mirā hāl-e-zabūñ tā-dam-e-marg

jaan ke saath ga.ī ek nazar kī ummīd

va.ada-e-vasl meñ thā kis qadar andāz-e-fareb

na thī ummīd-e-vafā us se magar kī ummīd

zabt-e-ġham tark-e-havas pās-e-vafā kartā huuñ

aah ke saath rahī dil meñ asar kī ummīd

tere qadmoñ meñ hī ġhaltāñ na huā zīnat-e-gosh

ḳhaak meñ mil ga.ī afsos guhar kī ummīd

kāvish-e-tīr kahāñ burrish-e-shamshīr kahāñ

dil kī hasrat hai abas aur jigar kī ummīd

poñchhte poñchhte aañsū mire vo sharmā.e

kyoñ kahā haa.e ye thī dīda-e-tar kī ummīd

aarzū hai ki dil-e-sāf meñ ho jalva-e-yār

raushan ā.īne se hai ā.ina-gar kī ummīd

sham.a-sāñ sub.h-e-shab-e-va.ada huā jal ke tamām

ho ga.ī ḳhaak mirī chār-pahar kī ummīd

dīda-e-shauq bane mahv-e-tamāshā Thahre

terā jalva hai magar shams-o-qamar kī ummīd

abhī vo haal hai jo sadma-e-shab se hotā

shām-e-hijrāñ nazar aatī hai sahar kī ummīd

haath se us ke hue qatl na ġham hī se halāk

puurī hotī hai idhar kī na udhar kī ummīd

zo.af achchhā hai rafīq apnā tarīq-e-ġham meñ

har qadam kyoñ na ho anjām-e-safar kī ummīd

tum ko saudā hai 'zakī' aah meñ tāsīr kahāñ

shajar-e-bed se rakhte ho samar kī ummīd

qatra-e-ashk se taskin-e-jigar ki ummid

qulzum-e-chashm se hai aab-e-guhar ki ummid

gham mein hoti hai ajab-KHez bashar ki ummid

dard-e-jaan-kah-e-firaq aur sahar ki ummid

qatl ko us ne pas-az-umr nikali talwar

baad muddat ke bar aai mere sar ki ummid

nazar aata hai bayaban se adam ko jaana

KHak ho dard-e-junun mein mujhe ghar ki ummid

us ne dekha na mera haal-e-zabun ta-dam-e-marg

jaan ke sath gai ek nazar ki ummid

wada-e-wasl mein tha kis qadar andaz-e-fareb

na thi ummid-e-wafa us se magar ki ummid

zabt-e-gham tark-e-hawas pas-e-wafa karta hun

aah ke sath rahi dil mein asar ki ummid

tere qadmon mein hi ghaltan na hua zinat-e-gosh

KHak mein mil gai afsos guhar ki ummid

kawish-e-tir kahan burrish-e-shamshir kahan

dil ki hasrat hai abas aur jigar ki ummid

ponchhte ponchhte aansu mere wo sharmae

kyon kaha hae ye thi dida-e-tar ki ummid

aarzu hai ki dil-e-saf mein ho jalwa-e-yar

raushan aaine se hai aaina-gar ki ummid

shama-san subh-e-shab-e-wada hua jal ke tamam

ho gai KHak meri chaar-pahar ki ummid

dida-e-shauq bane mahw-e-tamasha Thahre

tera jalwa hai magar shams-o-qamar ki ummid

abhi wo haal hai jo sadma-e-shab se hota

sham-e-hijran nazar aati hai sahar ki ummid

hath se us ke hue qatl na gham hi se halak

puri hoti hai idhar ki na udhar ki ummid

zoaf achchha hai rafiq apna tariq-e-gham mein

har qadam kyon na ho anjam-e-safar ki ummid

tum ko sauda hai 'zaki' aah mein tasir kahan

shajar-e-bed se rakhte ho samar ki ummid