qatra-e-shabnam ko jalte aaftabon mein na rakh

qatra-e-shabnam ko jalte āftāboñ meñ na rakh

ek hī jaañ hai use itne azāboñ meñ na rakh

ā.inoñ se dostī kī hai to apnā aks dekh

apne chehre ko chhupā kar yuuñ naqāboñ meñ na rakh

merī āñkhoñ ko bhī koī ḳhūbsūrat ḳhvāb de

mujh ko har lamha basā kar apne ḳhvāboñ meñ na rakh

aisī bātoñ se hī vo rahtā hai kuchh sahmā huā

us ke aage apne hoñToñ ko gulāboñ meñ na rakh

pāniyoñ ke shahr meñ har mauj ik sailāb hai

dekh apnī ḳhvāhishoñ ko in habāboñ meñ na rakh

sirf lamhātī nashoñ meñ dard kī lazzat na DhūñD

is tarah mad.hosh apne ko sharāboñ meñ na rakh

qatra-e-shabnam ko jalte aaftabon mein na rakh

ek hi jaan hai use itne azabon mein na rakh

aainon se dosti ki hai to apna aks dekh

apne chehre ko chhupa kar yun naqabon mein na rakh

meri aankhon ko bhi koi KHubsurat KHwab de

mujh ko har lamha basa kar apne KHwabon mein na rakh

aisi baaton se hi wo rahta hai kuchh sahma hua

us ke aage apne honTon ko gulabon mein na rakh

paniyon ke shahr mein har mauj ek sailab hai

dekh apni KHwahishon ko in hababon mein na rakh

sirf lamhati nashon mein dard ki lazzat na DhunD

is tarah madhosh apne ko sharabon mein na rakh