qatra qatra nam miTTi mein

qatra qatra nam miTTī meñ

bo.eñ apne ġham miTTī meñ

ye miTTī hai aur tarah kī

jamte nahīñ qadam miTTī meñ

ye bachche haiñ aur hī Dhab ke

khelte haiñ kam-kam miTTī meñ

ek imkān aur ek andesha

donoñ haiñ bāham miTTī meñ

sachchal sā.īñ kyā takte ho

mil gayā ik 'ālam miTTī meñ

shaah bhaTā.ī kuchh to bolo

kuchh to ho dam-ḳham miTTī meñ

tum bhī ralte dekh rahe ho

bachche aur parcham miTTī meñ

kaisī anokhī fasl uThī hai

apne lahū se nam miTTī meñ

nange sūraj se laḌtā hai

hariyālī kā ġham miTTī meñ

jab bhī koñpal haath hilā.e

dekhūñ nayā janam miTTī meñ

sab ko ik din mil jaanā hai

kyā tum aur kyā ham miTTī meñ

qatra qatra nam miTTi mein

boen apne gham miTTi mein

ye miTTi hai aur tarah ki

jamte nahin qadam miTTi mein

ye bachche hain aur hi Dhab ke

khelte hain kam-kam miTTi mein

ek imkan aur ek andesha

donon hain baham miTTi mein

sachchal sain kya takte ho

mil gaya ek 'alam miTTi mein

shah bhaTai kuchh to bolo

kuchh to ho dam-KHam miTTi mein

tum bhi ralte dekh rahe ho

bachche aur parcham miTTi mein

kaisi anokhi fasl uThi hai

apne lahu se nam miTTi mein

nange suraj se laDta hai

hariyali ka gham miTTi mein

jab bhi konpal hath hilae

dekhun naya janam miTTi mein

sab ko ek din mil jaana hai

kya tum aur kya hum miTTi mein