qatre gire jo kuchh araq-e-infial ke

qatre gire jo kuchh araq-e-infi.āl ke

dariyā bahā diye karam-e-zul-jalāl ke

pahlū se dil ko le ga.e vo dekh-bhāl ke

yūsuf ko le chale haiñ kueñ se nikāl ke

kyuuñ miTTī dene aa.e jo va.ada thā ġhair se

jaate kahāñ ho aañkh meñ tum ḳhaak Daal ke

labrez maiñ ne mai se na dekhā use kabhī

phūTe nasīb haiñ mire jām-e-sifāl ke

hai mujh meñ aur kohkan-o-qais meñ ye farq

maiñ vahshī-e-azal huuñ ye dīvāne haal ke

ho tuur par uruuj unheñ tū ho ġharq-e-nīl

fir.aun ye milā tujhe muusā ko paal ke

kahtī hai baḌh ke zulf kamar se dam-e-ḳhirām

rakh dūñgī maiñ kamar ke abhī bal nikāl ke

rakheñgī ab kahīñ kā na piirī kī laġhzisheñ

rakhnā qadam 'vasīm' bahut hī sambhāl ke

qatre gire jo kuchh araq-e-infial ke

dariya baha diye karam-e-zul-jalal ke

pahlu se dil ko le gae wo dekh-bhaal ke

yusuf ko le chale hain kuen se nikal ke

kyun miTTi dene aae jo wada tha ghair se

jate kahan ho aankh mein tum KHak Dal ke

labrez main ne mai se na dekha use kabhi

phuTe nasib hain mere jam-e-sifal ke

hai mujh mein aur kohkan-o-qais mein ye farq

main wahshi-e-azal hun ye diwane haal ke

ho tur par uruj unhen tu ho gharq-e-nil

firaun ye mila tujhe musa ko pal ke

kahti hai baDh ke zulf kamar se dam-e-KHiram

rakh dungi main kamar ke abhi bal nikal ke

rakhengi ab kahin ka na piri ki laghzishen

rakhna qadam 'wasim' bahut hi sambhaal ke