قطرے قطرے کو کبھی ترسا نہ تھا

قطرے قطرے کو کبھی ترسا نہ تھا

میں کہ دریا تھا کوئی صحرا نہ تھا

حسرتوں کی جھیل پر کہرا نہ تھا

ہم سفر سورج تھا میں تنہا نہ تھا

چہرہ چہرہ تھا شناسا شہر میں

میں کسی کی آنکھ کا تارا نہ تھا

پتھروں کے شہر میں شیشہ بدن

میں ہی تھا جو ٹوٹ کر بکھرا نہ تھا

بستی بستی بے حسی کی دھول تھی

اب کے ساون ٹوٹ کے برسا نہ تھا

چاندنی کی دھوپ تھی چاروں طرف

شہر دل میں چاند سا چہرا نہ تھا

اس کا چہرہ ہے کہ نشترؔ کی غزل

آئنے پر تبصرہ لکھا نہ تھا