qayamat thi ki tum guzrin magar sab KHairiyat se hain

qayāmat thī ki tum guzrīñ magar sab ḳhairiyat se haiñ

ye duniyā dost sāthī chārāgar sab ḳhairiyat se haiñ

vahī din kā nikalnā hai vahī phir shaam kā Dhalnā

tumhāre baad bhī shām-o-sahar sab ḳhairiyat se haiñ

tumhārī yaad se raushan mirā ġham-ḳhāna rahtā hai

ujālā raushnī shams-o-qamar sab ḳhairiyat se haiñ

mirā TuuTā huā dil jā-ba-jā ab reza reza hai

rag-e-jāñ pāra-e-qalb-o-jigar sab ḳhairiyat se haiñ

go tum tak jā nahīñ paate tum un ko sun nahīñ pātīñ

vo lekin nāla-hā-e-be-asar sab ḳhairiyat se haiñ

maiñ tum se jhuuT bolūñ yuuñ kahūñ ghar ḳhairiyat hai sab

chalo sab Thiik hai dīvār-o-dar sab ḳhairiyat se haiñ

haiñ ham sab gardish-e-daurāñ ke faulādī shikanje meñ

salīb-e-zīst pe jakḌe bashar sab ḳhairiyat se haiñ

sabaq sad-rā.egānī kā jo āshiq paḌh nahīñ paa.e

haiñ ġhaltīda ba-ḳhūn-e-dil magar sab ḳhairiyat se haiñ

tumhāre baad se duniyā meñ shaffāfī zarā kam hai

riyā-kārī ziyāda hai magar sab ḳhairiyat se haiñ

ye dil tanhā tumheñ kho kar bahut vīrān rahtā hai

galī kūche ye bastī aur nagar sab ḳhairiyat se haiñ

qayamat thi ki tum guzrin magar sab KHairiyat se hain

ye duniya dost sathi chaaragar sab KHairiyat se hain

wahi din ka nikalna hai wahi phir sham ka Dhalna

tumhaare baad bhi sham-o-sahar sab KHairiyat se hain

tumhaari yaad se raushan mera gham-KHana rahta hai

ujala raushni shams-o-qamar sab KHairiyat se hain

mera TuTa hua dil ja-ba-ja ab reza reza hai

rag-e-jaan para-e-qalb-o-jigar sab KHairiyat se hain

go tum tak ja nahin pate tum un ko sun nahin patin

wo lekin nala-ha-e-be-asar sab KHairiyat se hain

main tum se jhuT bolun yun kahun ghar KHairiyat hai sab

chalo sab Thik hai diwar-o-dar sab KHairiyat se hain

hain hum sab gardish-e-dauran ke fauladi shikanje mein

salib-e-zist pe jakDe bashar sab KHairiyat se hain

sabaq sad-raegani ka jo aashiq paDh nahin pae

hain ghaltida ba-KHun-e-dil magar sab KHairiyat se hain

tumhaare baad se duniya mein shaffafi zara kam hai

riya-kari ziyaada hai magar sab KHairiyat se hain

ye dil tanha tumhein kho kar bahut viran rahta hai

gali kuche ye basti aur nagar sab KHairiyat se hain