qayamat waqt se pahle guzar jae to achchha ho

qayāmat vaqt se pahle guzar jaa.e to achchhā ho

nazar kuchh der jalvoñ par Thahar jaa.e to achchhā ho

agar ġham zabt kī had se guzar jaa.e to achchhā ho

fareb-e-rang-o-bū dil se utar jaa.e to achchhā ho

mirī barbādiyāñ hī dars-e-ibrat kaash ban jaa.eñ

kisī sūrat se ye duniyā sañvar jaa.e to achchhā ho

mohabbat mo'taqid kab tak rahegī ashk-o-shabnam kī

mirā sāġhar mai-e-irfāñ se bhar jaa.e to achchhā ho

zamāna mere dil kī dhaḌkanoñ ko khel samjhā hai

ye aalam ḳhair se yūñhī guzar jaa.e to achchhā ho

musībat dar-haqīqat ek tamhīd-e-masarrat hai

ma.āl-e-ġham pe duniyā kī nazar jaa.e to achchhā ho

nazar aa.ī to hai dhundlī sī ik tasvīr sāhil par

kahīñ ab dil kī kashtī bhī Thahar jaa.e to achchhā ho

fareb-e-husn kī rangīniyāñ bikhrī haiñ gulshan meñ

mohabbat be-niyāzāna guzar jaa.e to achchhā ho

zamāna bāġhbāñ ke zulm par tanqīd kartā hai

zarā majbūriyoñ par bhī nazar jaa.e to achchhā ho

jahāñ lākhoñ tamannāoñ kā ḳhuuñ ġham ne bahāyā hai

vahīñ jiine kī ye hasrat bhī mar jaa.e to achchhā ho

kahāñ tak 'shauq' dekhā jaa.e ā.īna fareboñ kā

ab in āñkhoñ se ye ḳhvāb-e-sahar jaa.e to achchhā ho

qayamat waqt se pahle guzar jae to achchha ho

nazar kuchh der jalwon par Thahar jae to achchha ho

agar gham zabt ki had se guzar jae to achchha ho

fareb-e-rang-o-bu dil se utar jae to achchha ho

meri barbaadiyan hi dars-e-ibrat kash ban jaen

kisi surat se ye duniya sanwar jae to achchha ho

mohabbat mo'taqid kab tak rahegi ashk-o-shabnam ki

mera saghar mai-e-irfan se bhar jae to achchha ho

zamana mere dil ki dhaDkanon ko khel samjha hai

ye aalam KHair se yunhi guzar jae to achchha ho

musibat dar-haqiqat ek tamhid-e-masarrat hai

maal-e-gham pe duniya ki nazar jae to achchha ho

nazar aai to hai dhundli si ek taswir sahil par

kahin ab dil ki kashti bhi Thahar jae to achchha ho

fareb-e-husn ki ranginiyan bikhri hain gulshan mein

mohabbat be-niyazana guzar jae to achchha ho

zamana baghban ke zulm par tanqid karta hai

zara majburiyon par bhi nazar jae to achchha ho

jahan lakhon tamannaon ka KHun gham ne bahaya hai

wahin jine ki ye hasrat bhi mar jae to achchha ho

kahan tak 'shauq' dekha jae aaina farebon ka

ab in aankhon se ye KHwab-e-sahar jae to achchha ho