qaza ka raaz hai muzmar jo chand sanson mein

qazā kā raaz hai muzmar jo chand sāñsoñ meñ

hayāt kā bhī ta.āruf hai chaar harfoñ meñ

charāġh fan ke jalā.eñge ham añdheroñ meñ

shu.ūr fikr kī mash.al hai apne hāthoñ meñ

shab-e-firāq chamakne lage dar-o-dīvār

mah-o-nujūm bhī shāmil haiñ mere ashkoñ meñ

abhī zamāne meñ namrūd kī ḳhudā.ī hai

zarā ḳhalīl to aa.eñ ḳhudā shanāsoñ meñ

balā-kashoñ ne sambhāle haiñ TuuTe paimāne

huzūr aap kahāñ aa.e dil-shikastoñ meñ

vo aa.ine ke muqābil bhī rūnumā na huā

vo ek shaḳhs jo baiThā hai chhup ke āñkhoñ meñ

nazar nazar hai tasadduq tere nazāroñ par

nafas nafas hai charāġhāñ mirī nigāhoñ meñ

agar 'hayāt' ḳhazaf se sadaf na ban jaa.e

shumār is kā bhī hotā hai sañg-rezo meñ

qaza ka raaz hai muzmar jo chand sanson mein

hayat ka bhi taaruf hai chaar harfon mein

charagh fan ke jalaenge hum andheron mein

shuur fikr ki mashal hai apne hathon mein

shab-e-firaq chamakne lage dar-o-diwar

mah-o-nujum bhi shamil hain mere ashkon mein

abhi zamane mein namrud ki KHudai hai

zara KHalil to aaen KHuda shanason mein

bala-kashon ne sambhaale hain TuTe paimane

huzur aap kahan aae dil-shikaston mein

wo aaine ke muqabil bhi runuma na hua

wo ek shaKHs jo baiTha hai chhup ke aankhon mein

nazar nazar hai tasadduq tere nazaron par

nafas nafas hai charaghan meri nigahon mein

agar 'hayat' KHazaf se sadaf na ban jae

shumar is ka bhi hota hai sang-rezo mein