qaza ka tir tha koi kaman se nikal gaya

qazā kā tiir thā koī kamān se nikal gayā

vo ek harf jo mirī zabān se nikal gayā

bahut ziyāda jhuknā paḌ rahā thā us ke saa.e meñ

so ek din maiñ us ke sā.ebān se nikal gayā

abhī to tere aur tire adū ke darmiyān huuñ

agar kabhī maiñ thak ke darmiyān se nikal gayā

mire adū ke ḳhvāb chaknā-chūr ho ke rah ga.e

maiñ jast bhar ke dasht-e-imtihān se nikal gayā

tire kalām-e-fan kā sirf maiñ hī qadr-dān huuñ

agar maiñ terī is bharī dukān se nikal gayā

qaza ka tir tha koi kaman se nikal gaya

wo ek harf jo meri zaban se nikal gaya

bahut ziyaada jhukna paD raha tha us ke sae mein

so ek din main us ke saeban se nikal gaya

abhi to tere aur tere adu ke darmiyan hun

agar kabhi main thak ke darmiyan se nikal gaya

mere adu ke KHwab chakna-chur ho ke rah gae

main jast bhar ke dasht-e-imtihan se nikal gaya

tere kalam-e-fan ka sirf main hi qadr-dan hun

agar main teri is bhari dukan se nikal gaya