qaza ke tir jab jab abru-e-qatil se nikle hain

qazā ke tiir jab jab abrū-e-qātil se nikle haiñ

jazāk-allāh ke na.are dil-e-bismil se nikle haiñ

kuchh aise kaam mere jazba-e-kāmil se nikle haiñ

vo mere saath hī hañgāma-e-mahfil se nikle haiñ

fazā.eñ gūñjtī haiñ aur fitrat raqs kartī hai

kuchh aise dard ke naġhme hamāre dil se nikle haiñ

jale haiñ dost bhī dushman bhī parvāne bhī sham.eñ bhī

ġharaz sab ḳhaak kar ke aap kī mahfil se nikle haiñ

mohabbat ibtidā apnī mohabbat intihā apnī

usī manzil ko jaanā hai usī manzil se nikle hai

zamīn-e-sañg se gul-hā-e-naġhma kī tavaqqo kyā

baḌe āsān misre bhī baḌī mushkil se nikle haiñ

qaza ke tir jab jab abru-e-qatil se nikle hain

jazak-allah ke nare dil-e-bismil se nikle hain

kuchh aise kaam mere jazba-e-kaamil se nikle hain

wo mere sath hi hangama-e-mahfil se nikle hain

fazaen gunjti hain aur fitrat raqs karti hai

kuchh aise dard ke naghme hamare dil se nikle hain

jale hain dost bhi dushman bhi parwane bhi shamen bhi

gharaz sab KHak kar ke aap ki mahfil se nikle hain

mohabbat ibtida apni mohabbat intiha apni

usi manzil ko jaana hai usi manzil se nikle hai

zamin-e-sang se gul-ha-e-naghma ki tawaqqo kya

baDe aasan misre bhi baDi mushkil se nikle hain