qismat ki lakiron ke sitam humne sahe hain

qismat kī lakīroñ ke sitam ham ne sahe haiñ

dariyā the kabhī ham bhī par ab pyāse khaḌe haiñ

sahrā meñ diyā ban ke jinheñ rasta dikhāyā

vo log havāoñ ke qabīle meñ khaḌe haiñ

bastī meñ hamārī haiñ bahut chāñd sitāre

sūraj ke ishāroñ pe magar chalne lage haiñ

dastār ko qadmoñ meñ kisī ke nahīñ rakkhā

ye baat alag hai ki ġharībī meñ pale haiñ

tum ā.inoñ ko zang lagā kar kahīñ rakh do

ham ā.inoñ se baat tirī karne lage haiñ

ḳhvāboñ ke pulande ko liye saath meñ tanhā

tā'bīr ke bāzār meñ barsoñ se khaḌe haiñ

ḳhvāboñ meñ har ik raat tirā aa ke satānā

be-sāḳhta har ḳhvāb pe ham hañsne lage haiñ

ye nuur jo uThtā huā tum dekh rahe ho

ye ashk hamāre haiñ jo āñkhoñ se Dhale haiñ

vo ghar jo buzurgoñ ne banāyā thā lahū se

din-rāt 'vasīm' us kī marammat meñ lage haiñ

qismat ki lakiron ke sitam hum ne sahe hain

dariya the kabhi hum bhi par ab pyase khaDe hain

sahra mein diya ban ke jinhen rasta dikhaya

wo log hawaon ke qabile mein khaDe hain

basti mein hamari hain bahut chand sitare

suraj ke ishaaron pe magar chalne lage hain

dastar ko qadmon mein kisi ke nahin rakkha

ye baat alag hai ki gharibi mein pale hain

tum aainon ko zang laga kar kahin rakh do

hum aainon se baat teri karne lage hain

KHwabon ke pulande ko liye sath mein tanha

ta'bir ke bazar mein barson se khaDe hain

KHwabon mein har ek raat tera aa ke satana

be-saKHta har KHwab pe hum hansne lage hain

ye nur jo uThta hua tum dekh rahe ho

ye ashk hamare hain jo aankhon se Dhale hain

wo ghar jo buzurgon ne banaya tha lahu se

din-raat 'wasim' us ki marammat mein lage hain