qismat mein hain barbaadiyan yaad-e-watan se kya gharaz

qismat meñ haiñ barbādiyāñ yād-e-vatan se kyā ġharaz

maiñ phuul huuñ TuuTā huā mujh ko chaman se kyā ġharaz

tū ne phirāyā dar-ba-dar taqdīr se kyā vāsta

tū ne milāyā ḳhaak meñ charḳh-e-kuhan se kyā ġharaz

ġhunche kahīñ khil kar hañseñ hañs kar tape kī kuchh kaheñ

mauj-e-tabassum ko bhalā tere dahan se kyā ġharaz

kyā qatl se dil shaad hai kahnā kisī kā yaad hai

mere shahīd-e-nāz ko qaid-e-kafan se kyā ġharaz

sad-chāk dāmāñ ho to ho TukḌe garebāñ ho to ho

ham aur hī aalam meñ haiñ ab tan-badan se kyā ġharaz

'nāzish' na chhoḌo shaġhl-e-mai taqvā kā da.avā hai riyā

tum sāf-bātin rind ho is makr-o-fan se kyā ġharaz

qismat mein hain barbaadiyan yaad-e-watan se kya gharaz

main phul hun TuTa hua mujh ko chaman se kya gharaz

tu ne phiraya dar-ba-dar taqdir se kya wasta

tu ne milaya KHak mein charKH-e-kuhan se kya gharaz

ghunche kahin khil kar hansen hans kar tape ki kuchh kahen

mauj-e-tabassum ko bhala tere dahan se kya gharaz

kya qatl se dil shad hai kahna kisi ka yaad hai

mere shahid-e-naz ko qaid-e-kafan se kya gharaz

sad-chaak daman ho to ho TukDe gareban ho to ho

hum aur hi aalam mein hain ab tan-badan se kya gharaz

'nazish' na chhoDo shaghl-e-mai taqwa ka dawa hai riya

tum saf-baatin rind ho is makr-o-fan se kya gharaz