qissa-e-dard-e-jigar kis se kahun kaise kahun

qissa-e-dard-e-jigar kis se kahūñ kaise kahūñ

ye mohabbat kā asar kis se kahūñ kaise kahūñ

raat bhar sham-e-nazar raushan kiye baiThā rahā

vo na aa.e tā-sahar kis se kahūñ kaise kahūñ

dil mirā betāb hai kis kī tajallī ke liye

kyoñ pareshāñ hai nazar kis se kahūñ kaise kahūñ

kaun hai āḳhir vo kis ke naqsh-e-pā ke vāste

muntazir hai rahguzar kis se kahūñ kaise kahūñ

pūchhne ko aa.e haiñ ahbāb merā hāl-e-dil

kahnā to chāhūñ magar kis se kahūñ kaise kahūñ

kaise kaise dukh uThā.e maiñ ne rāh-e-shauq meñ

dāstān-e-pur-asar kis se kahūñ kaise kahūñ

bā.is-e-rahmat hai yā hai bā.is-e-zahmat 'mayank'

ik mohabbat kī nazar kis se kahūñ kaise kahūñ

qissa-e-dard-e-jigar kis se kahun kaise kahun

ye mohabbat ka asar kis se kahun kaise kahun

raat bhar sham-e-nazar raushan kiye baiTha raha

wo na aae ta-sahar kis se kahun kaise kahun

dil mera betab hai kis ki tajalli ke liye

kyon pareshan hai nazar kis se kahun kaise kahun

kaun hai aaKHir wo kis ke naqsh-e-pa ke waste

muntazir hai rahguzar kis se kahun kaise kahun

puchhne ko aae hain ahbab mera haal-e-dil

kahna to chahun magar kis se kahun kaise kahun

kaise kaise dukh uThae main ne rah-e-shauq mein

dastan-e-pur-asar kis se kahun kaise kahun

bais-e-rahmat hai ya hai bais-e-zahmat 'mayank'

ek mohabbat ki nazar kis se kahun kaise kahun