qiyam-e-alam-e-fani nahin qiyam abhi

qiyām-e-ālam-e-fānī nahīñ qiyām abhī

bashar ki is pe hai masrūf-e-ehtimām abhī

tumhāre dard ko hāsil nahīñ davām abhī

ki hai ḳhayāl tumhārā ḳhayāl-e-ḳhām abhī

maiñ us se qat'-e-ta'alluq kā dā'vedār to huuñ

magar hai dil ki hai us shoḳh kā ġhulām abhī

kisī ne rū-e-munavvar se zulf jhaTkī hai

abhī tulū'-e-sahar hai huī thī shaam abhī

badal rahī hai halāvat meñ talḳhī-e-ayyām

mirī zabān pe aayā thā terā naam abhī

jalā diye haiñ sar-e-shām dāġh-e-dil ham ne

vo un kā aanā aur aane kā ehtimām abhī

‘ilāj-e-gardish-e-ayyām hone vaalā hai

zarā sī der hai gardish meñ aayā jaam abhī

jahāñ pahuñchne ke letā huuñ ḳhvāb bachpan se

hai kitnā duur ḳhudāvand vo maqām abhī

qazā ne dī mujhe mohlat na muskurāne kī

ġham-e-hayāt se lenā thā intiqām abhī

jahāñ ki rāh-rau rukte haiñ saañs lene ko

hamārī ziist meñ aayā nahīñ maqām abhī

abhī to raah meñ baaqī haiñ laakh nazzāre

ai asp-e-umr zarā ho na tez-gām abhī

vo jis se 'ishq kā anjām mere sāmne hai

nahīñ huī mirī us se du'ā salām abhī

abhī se is tarah māyūs hoñ na ahl-e-bazm

'amar' se bazm-e-suḳhan meñ haiñ ḳhush-kalām abhī

qiyam-e-alam-e-fani nahin qiyam abhi

bashar ki is pe hai masruf-e-ehtimam abhi

tumhaare dard ko hasil nahin dawam abhi

ki hai KHayal tumhaara KHayal-e-KHam abhi

main us se qat'-e-ta'alluq ka da'wedar to hun

magar hai dil ki hai us shoKH ka ghulam abhi

kisi ne ru-e-munawwar se zulf jhaTki hai

abhi tulu'-e-sahar hai hui thi sham abhi

badal rahi hai halawat mein talKHi-e-ayyam

meri zaban pe aaya tha tera nam abhi

jala diye hain sar-e-sham dagh-e-dil hum ne

wo un ka aana aur aane ka ehtimam abhi

‘ilaj-e-gardish-e-ayyam hone wala hai

zara si der hai gardish mein aaya jam abhi

jahan pahunchne ke leta hun KHwab bachpan se

hai kitna dur KHudawand wo maqam abhi

qaza ne di mujhe mohlat na muskurane ki

gham-e-hayat se lena tha intiqam abhi

jahan ki rah-rau rukte hain sans lene ko

hamari zist mein aaya nahin maqam abhi

abhi to rah mein baqi hain lakh nazzare

ai asp-e-umr zara ho na tez-gam abhi

wo jis se 'ishq ka anjam mere samne hai

nahin hui meri us se du'a salam abhi

abhi se is tarah mayus hon na ahl-e-bazm

'amar' se bazm-e-suKHan mein hain KHush-kalam abhi