qubul hai gham-e-duniya tere hawale se

qubūl hai ġham-e-duniyā tire havāle se

ye bojh varna sañbhaltā nahīñ sambhāle se

surāġh apnā udhar hī kahīñ mile shāyad

tane hue haiñ jidhar makḌiyoñ ke jaale se

maiñ ek zarra-e-āvāra aur mirī ḳhātir

samundaroñ sī ye rāteñ ye din himāle se

khulī to rakhtā huuñ maiñ ghar kī khiḌkiyāñ lekin

vahī tamām nazāre haiñ dekhe-bhāle se

kisī kī yaad bhī unvān-e-bevafā.ī thī

paḌe haiñ paañv meñ qabl-e-safar bhī chhāle se

sukūn kitnā hai jī ko ye soch kar ki hameñ

haram se koī 'ilāqa na ab shivāle se

ye kam nahīñ ki maiñ us kī du'ā meñ shāmil huuñ

kuchh aur chāhiye kyā duur jaane vaale se

qubul hai gham-e-duniya tere hawale se

ye bojh warna sanbhalta nahin sambhaale se

suragh apna udhar hi kahin mile shayad

tane hue hain jidhar makDiyon ke jale se

main ek zarra-e-awara aur meri KHatir

samundaron si ye raaten ye din himale se

khuli to rakhta hun main ghar ki khiDkiyan lekin

wahi tamam nazare hain dekhe-bhaale se

kisi ki yaad bhi unwan-e-bewafai thi

paDe hain panw mein qabl-e-safar bhi chhaale se

sukun kitna hai ji ko ye soch kar ki hamein

haram se koi 'ilaqa na ab shiwale se

ye kam nahin ki main us ki du'a mein shamil hun

kuchh aur chahiye kya dur jaane wale se