qubul karte hue ijtinab karte hue

qubūl karte hue ijtināb karte hue

koī ḳhalish sī rahī intiḳhāb karte hue

kuchh itnā fāsla thā mujh meñ aur qāfile meñ

safar tamām huā ham-rikāb karte hue

ye kis kā naam ubharne lagā hai kāġhaz par

bayāz-e-'umr tirā intisāb karte hue

ḳhud apne aap pe tartīb-vār khultā huuñ

rumūz-e-kaun-o-makāñ be-hijāb karte hue

'ajīb yāft-o-nuqsān hai mohabbat kā

maiñ sharmsār huā huuñ hisāb karte hue

tumhāre baa'd maiñ duniyā kī samt dekhtā huuñ

dil-o-nigāh ko vaqf-e-'azāb karte hue

qubul karte hue ijtinab karte hue

koi KHalish si rahi intiKHab karte hue

kuchh itna fasla tha mujh mein aur qafile mein

safar tamam hua ham-rikab karte hue

ye kis ka nam ubharne laga hai kaghaz par

bayaz-e-'umr tera intisab karte hue

KHud apne aap pe tartib-war khulta hun

rumuz-e-kaun-o-makan be-hijab karte hue

'ajib yaft-o-nuqsan hai mohabbat ka

main sharmsar hua hun hisab karte hue

tumhaare ba'd main duniya ki samt dekhta hun

dil-o-nigah ko waqf-e-'azab karte hue