qudrat hai ab na dil pe na qabu zaban par

qudrat hai ab na dil pe na qaabū zabān par

qadmoñ pe un ke sar hai dimāġh āsmān par

ye rāz-e-ishq aa gayā jis din zabān par

hogā falak zamīñ pe zamīñ āsmān par

saaqī kī vo nazar hai na sāġhar kī gardisheñ

ab kyā rakhā hai pīr-e-muġhāñ kī dūkān par

allāh un ke barq-e-tabassum kī ḳhair ho

maḳhlūq ro rahī hai mirī dāstān par

āzādiyāñ bhī apnī asīrī se kam nahīñ

jo dil meñ hai vo lā nahīñ sakte zabān par

ab un kī justujū hai na apnī talāsh hai

jab se vo chhā ga.e haiñ hamāre gumān par

apnī zabāñ se kyoñ maiñ kisī ko burā kahūñ

khul jā.egī har ek vafā imtihān par

ye husn-o-ishq donoñ haqīqat meñ ek haiñ

lekin ye raaz lā nahīñ saktā zabān par

bār-e-zamīñ hai aaj hamārā vajūd bhī

rahtā thā ye dimāġh kabhī āsmān par

kaunain mere husn kā ik aks hai 'munīr'

chhā.ī huī haiñ dil kī ziyā.eñ jahān par

qudrat hai ab na dil pe na qabu zaban par

qadmon pe un ke sar hai dimagh aasman par

ye raaz-e-ishq aa gaya jis din zaban par

hoga falak zamin pe zamin aasman par

saqi ki wo nazar hai na saghar ki gardishen

ab kya rakha hai pir-e-mughan ki dukan par

allah un ke barq-e-tabassum ki KHair ho

maKHluq ro rahi hai meri dastan par

aazadiyan bhi apni asiri se kam nahin

jo dil mein hai wo la nahin sakte zaban par

ab un ki justuju hai na apni talash hai

jab se wo chha gae hain hamare guman par

apni zaban se kyon main kisi ko bura kahun

khul jaegi har ek wafa imtihan par

ye husn-o-ishq donon haqiqat mein ek hain

lekin ye raaz la nahin sakta zaban par

bar-e-zamin hai aaj hamara wajud bhi

rahta tha ye dimagh kabhi aasman par

kaunain mere husn ka ek aks hai 'munir'

chhai hui hain dil ki ziyaen jahan par