qurbani-e-insan ka nahin shauq gar usko

qurbānī-e-insāñ kā nahīñ shauq gar us ko

phir eid ke din kyoñ mujhe zindāñ se nikālā

ahbāb ke kāñdhe se girā jaatā thā jis dam

tābūt mirā gor-e-ġharībāñ se nikālā

taqdīr ne sāhil pe kiye saikḌoñ phere

taḳhta na hamārā kabhī tūfāñ se nikālā

shāna dil-e-sad-chāk ke naqsha se banāyā

ā.īna mire dīda-e-hairāñ se nikālā

vo tifl-e-sharīr aur se kab chūke hai jis ne

ustād ko do din meñ dabistāñ se nikālā

lailā bhī magar parda-e-mahmil kī thī dushman

naaqa ko ragaḌ kar jo muġhīlāñ se nikālā

zid mujh se thī majnūñ kī hikāyat kā phir ai jaan

kyoñ tum ne varaq apne gulistāñ se nikālā

ab tak mirī aahoñ meñ hai sumbul kī sī ḳhushbū

ik din jo dhuāñ yaar ke quliyāñ se nikālā

qurbani-e-insan ka nahin shauq gar us ko

phir eid ke din kyon mujhe zindan se nikala

ahbab ke kandhe se gira jata tha jis dam

tabut mera gor-e-ghariban se nikala

taqdir ne sahil pe kiye saikDon phere

taKHta na hamara kabhi tufan se nikala

shana dil-e-sad-chaak ke naqsha se banaya

aaina mere dida-e-hairan se nikala

wo tifl-e-sharir aur se kab chuke hai jis ne

ustad ko do din mein dabistan se nikala

laila bhi magar parda-e-mahmil ki thi dushman

naqa ko ragaD kar jo mughilan se nikala

zid mujh se thi majnun ki hikayat ka phir ai jaan

kyon tum ne waraq apne gulistan se nikala

ab tak meri aahon mein hai sumbul ki si KHushbu

ek din jo dhuan yar ke quliyan se nikala