qurbaten na ban pae fasle simaT kar bhi

qurbateñ na ban paa.e fāsle simaT kar bhī

ham ki ajnabī Thahre aap se lipaT kar bhī

hādsoñ ne har sūrat apnī zad meñ rakhnā thā

ham ne chal ke dekhā hai rāste se haT kar bhī

āgahī kī manzil se lauT jaa.eñ ham kaise

us jagah nahīñ jaa.ez dekhnā palaT kar bhī

ham ne laakh samjhāyā dil magar nahīñ maanā

mutma.in sā lagtā hai kirchiyoñ meñ baT kar bhī

dasht-e-dil se jo uTThā ho ke sūrat-e-shabnam

rah gayā hai palkoñ par vo ġhubār chhaT kar bhī

pattharoñ ke tūfāñ meñ dil-numā gharoñdoñ ne

aazmā liyā āḳhir ḳhud ko aaj DaT kar bhī

dā.eroñ ke raahī the manzileñ kahāñ miltīñ

be-murād haiñ paañv gard-e-rah se aT kar bhī

qurbaten na ban pae fasle simaT kar bhi

hum ki ajnabi Thahre aap se lipaT kar bhi

hadson ne har surat apni zad mein rakhna tha

hum ne chal ke dekha hai raste se haT kar bhi

aagahi ki manzil se lauT jaen hum kaise

us jagah nahin jaez dekhna palaT kar bhi

hum ne lakh samjhaya dil magar nahin mana

mutmain sa lagta hai kirchiyon mein baT kar bhi

dasht-e-dil se jo uTTha ho ke surat-e-shabnam

rah gaya hai palkon par wo ghubar chhaT kar bhi

pattharon ke tufan mein dil-numa gharondon ne

aazma liya aaKHir KHud ko aaj DaT kar bhi

daeron ke rahi the manzilen kahan miltin

be-murad hain panw gard-e-rah se aT kar bhi