qusur kya hai jo humse KHataen hoti hain

qusūr kyā hai jo ham se ḳhatā.eñ hotī haiñ

huzūr aap kī qātil adā.eñ hotī haiñ

barasnā aatā nahīñ un ko hai yahī ronā

falak pe roz hī kaalī ghaTā.eñ hotī haiñ

gunāh-e-ishq to āñkhoñ kā mashġhala Thahrā

ye kyā sitam hai ki dil ko sazā.eñ hotī haiñ

zarā sī oT agar le sako to achchhā hai

diye kī taak meñ shātir havā.eñ hotī haiñ

hamāre paas bhalā kyā hai aur dene ko

tumhāre vāste dil meñ duā.eñ hotī haiñ

tujhe bhī saikḌoñ sammān mil ga.e hote

‘akelā’ tujh se kahāñ iltijā.eñ hotī haiñ

qusur kya hai jo hum se KHataen hoti hain

huzur aap ki qatil adaen hoti hain

barasna aata nahin un ko hai yahi rona

falak pe roz hi kali ghaTaen hoti hain

gunah-e-ishq to aankhon ka mashghala Thahra

ye kya sitam hai ki dil ko sazaen hoti hain

zara si oT agar le sako to achchha hai

diye ki tak mein shatir hawaen hoti hain

hamare pas bhala kya hai aur dene ko

tumhaare waste dil mein duaen hoti hain

tujhe bhi saikDon samman mil gae hote

‘akela’ tujh se kahan iltijaen hoti hain