qusur sab hai ye na-motabar alamat ka

qusūr sab hai ye nā-mo'tabar alāmat kā

ulajh ke rah gayā mafhūm hī ibārat kā

tumhāre sāmne manzar kahāñ qayāmat kā

azaab sahte kabhī kaash tum bhī hijrat kā

qalam ke saath zabāñ bhī tarāsh lo merī

ye imtihān bhī le lo mirī sadāqat kā

koī sunā.e to aa kar hadīs-e-shab-zadagāñ

abhī bujhā nahīñ sho.ala mirī samā.at kā

mirī hayāt kī vus.at pe ho gayā hai muhīt

vo ek pal jo amiiñ hai tirī rifāqat kā

hai ek dāna-e-gandum kī fitna-sāmānī

yahī hai nukta-e-āġhāz apnī hijrat kā

tabāhiyoñ pe 'qamar' chup haiñ log bastī ke

hai intizār abhī shāyad kisī karāmat kā

qusur sab hai ye na-mo'tabar alamat ka

ulajh ke rah gaya mafhum hi ibarat ka

tumhaare samne manzar kahan qayamat ka

azab sahte kabhi kash tum bhi hijrat ka

qalam ke sath zaban bhi tarash lo meri

ye imtihan bhi le lo meri sadaqat ka

koi sunae to aa kar hadis-e-shab-zadagan

abhi bujha nahin shoala meri samaat ka

meri hayat ki wusat pe ho gaya hai muhit

wo ek pal jo amin hai teri rifaqat ka

hai ek dana-e-gandum ki fitna-samani

yahi hai nukta-e-aghaz apni hijrat ka

tabahiyon pe 'qamar' chup hain log basti ke

hai intizar abhi shayad kisi karamat ka