qutub ghiyas qalandar ali wali miTTi

qutub ġhiyās qalandar alī valī miTTī

tumhāre ishq meñ kyā kyā nahīñ huī miTTī

hai murġh-e-aql abhī tak isī kashākash meñ

falak se aage kahāñ tak chalī ga.ī miTTī

phir ek nuur ne is meñ qiyām farmāyā

maiñ sochtā thā ki kis vāste banī miTTī

ye log kyoñ mujhe sar par uThā.e phirte haiñ

ye kis mazār se mas ho ga.ī mirī miTTī

ye kis ne ḳhuun ke aañsū rulā diye us ko

ye kis ke zikr pe yuuñ surḳh ho uThī miTTī

ye zalzaloñ kā tasalsul ye sūkhtī nadiyāñ

batā rahe haiñ ki had se nikal ga.ī miTTī

ḳhudā qasam mirī turbat se nuur phūTegā

tumhāre haath se mujh par agar paḌī miTTī

are o nām-nihādo ye kis gumān meñ ho

na jaane kitne ḳhudāoñ ko khā ga.ī miTTī

hamāre paañv meñ chhāle to paḌ ga.e lekin

hamāre azm se 'shādāb' ho ga.ī miTTī

qutub ghiyas qalandar ali wali miTTi

tumhaare ishq mein kya kya nahin hui miTTi

hai murgh-e-aql abhi tak isi kashakash mein

falak se aage kahan tak chali gai miTTi

phir ek nur ne is mein qiyam farmaya

main sochta tha ki kis waste bani miTTi

ye log kyon mujhe sar par uThae phirte hain

ye kis mazar se mas ho gai meri miTTi

ye kis ne KHun ke aansu rula diye us ko

ye kis ke zikr pe yun surKH ho uThi miTTi

ye zalzalon ka tasalsul ye sukhti nadiyan

bata rahe hain ki had se nikal gai miTTi

KHuda qasam meri turbat se nur phuTega

tumhaare hath se mujh par agar paDi miTTi

are o nam-nihado ye kis guman mein ho

na jaane kitne KHudaon ko kha gai miTTi

hamare panw mein chhaale to paD gae lekin

hamare azm se 'shadab' ho gai miTTi