raegan bughz-o-hasad mein zindagani mat karo

rā.egāñ buġhz-o-hasad meñ zindagānī mat karo

qadr rishtoñ kī karo yuuñ ḳhuun paanī mat karo

ek duuje se chaman ke phuul bhī hoñ bad-gumāñ

yuuñ ta.assub-rez hargiz bāġhbānī mat karo

umr kā Dhal jā.egā sūraj to phir pachhtāoge

qīmtī barbād apnī ye javānī mat karo

tum yahāñ insāniyat ke ik alam-bardār ho

yuuñ abas kirdār apnā be-ma.ānī mat karo

pahle to sūraj ko lā kar rakh diyā sar par mire

ab dikhāve ke liye ye sā.ebānī mat karo

ai mire ashko mirī āñkhoñ ke andar hī raho

tum mire jazbāt kī yuuñ tarjumānī mat karo

kaan bhar dene se yuuñ hī aire-ġhaire shaḳhs ke

paidā apne dil meñ hargiz bad-gumānī mat karo

ahl-e-masnad tum se merā bas yahī hai iltimās

muflisoñ kā ḳhuun pī kar hukmrānī mat karo

is tarah qadmoñ meñ rakh kar bātiloñ ke 'sād' tum

apnī ye dastār mailī ḳhāndānī mat karo

raegan bughz-o-hasad mein zindagani mat karo

qadr rishton ki karo yun KHun pani mat karo

ek duje se chaman ke phul bhi hon bad-guman

yun tassub-rez hargiz baghbani mat karo

umr ka Dhal jaega suraj to phir pachhtaoge

qimti barbaad apni ye jawani mat karo

tum yahan insaniyat ke ek alam-bardar ho

yun abas kirdar apna be-maani mat karo

pahle to suraj ko la kar rakh diya sar par mere

ab dikhawe ke liye ye saebani mat karo

ai mere ashko meri aankhon ke andar hi raho

tum mere jazbaat ki yun tarjumani mat karo

kan bhar dene se yun hi aire-ghaire shaKHs ke

paida apne dil mein hargiz bad-gumani mat karo

ahl-e-masnad tum se mera bas yahi hai iltimas

muflison ka KHun pi kar hukmrani mat karo

is tarah qadmon mein rakh kar baatilon ke 'sad' tum

apni ye dastar maili KHandani mat karo