raegan kash mera nala-e-shab-gir na ho

rā.egāñ kaash mirā nāla-e-shab-gīr na ho

aah merī na ho vo jis meñ ki tāsīr na ho

bante hī rahte haiñ miT miT ke nuqūsh-e-hastī

jo bigaḌ ke na bane vo mirī taqdīr na ho

terī rahmat kā taqāza to ye hai shān-e-karam

banda terā koī sharminda-e-taqsīr na ho

kār-farmā hī rahe ḳhud hī jo manshā-e-azal

sa.i-e-paiham kabhī minnat-kash-e-tadbīr na ho

apnī mahrūmī kā jis ko ho gila hashr ke din

Dar rahā huuñ ki kahīñ vo mirī taqdīr na ho

mā.il-e-lutf-o-karam jo na ho vo kab hai ḳhudā

banda vo banda nahīñ jis se ki taqsīr na ho

apne mahbūb kī ummat kā rahe kuchh to lihāz

tere hote hue ham bandoñ kī tahqīr na ho

sāmne aa.e to ruuyā kī haqīqat jānūñ

ḳhvāb hī kyā vo jo sharminda-e-ta.abīr na ho

sharh-e-rūdād-e-mohabbat lab-e-ḳhāmosh na hoñ

be-zabānī ġham-e-dil kī kahīñ tafsīr na ho

hausla merī umīdoñ kā jo baḌhtā hī rahe

nā-murādī kī mire sāmne tasvīr na ho

jāntā huuñ ki bahār aa.egī lekin 'mehdī'

māna-e-dasht-navardī kahīñ zanjīr na ho

raegan kash mera nala-e-shab-gir na ho

aah meri na ho wo jis mein ki tasir na ho

bante hi rahte hain miT miT ke nuqush-e-hasti

jo bigaD ke na bane wo meri taqdir na ho

teri rahmat ka taqaza to ye hai shan-e-karam

banda tera koi sharminda-e-taqsir na ho

kar-farma hi rahe KHud hi jo mansha-e-azal

sai-e-paiham kabhi minnat-kash-e-tadbir na ho

apni mahrumi ka jis ko ho gila hashr ke din

Dar raha hun ki kahin wo meri taqdir na ho

mail-e-lutf-o-karam jo na ho wo kab hai KHuda

banda wo banda nahin jis se ki taqsir na ho

apne mahbub ki ummat ka rahe kuchh to lihaz

tere hote hue hum bandon ki tahqir na ho

samne aae to ruya ki haqiqat jaanun

KHwab hi kya wo jo sharminda-e-tabir na ho

sharh-e-rudad-e-mohabbat lab-e-KHamosh na hon

be-zabani gham-e-dil ki kahin tafsir na ho

hausla meri umidon ka jo baDhta hi rahe

na-muradi ki mere samne taswir na ho

jaanta hun ki bahaar aaegi lekin 'mehdi'

mana-e-dasht-nawardi kahin zanjir na ho