rah apni na rahbar apna

raah apnī na rāhbar apnā

kāmrāñ kaise ho safar apnā

naaz kyā aarzī Thikāne par

shahr apnā na koī ghar apnā

ab jo hogā vo dekhā jā.egā

aap kā dar hai aur sar apnā

ham ko jiine kī aarzū hai abhī

kyoñ hai māyūs chārāgar apnā

phir na.ī manzileñ talāshte haiñ

ḳhatm hotā nahīñ safar apnā

log hote haiñ mustafīd to hoñ

ham nahīñ bechte hunar apnā

nau-e-insāñ ke kaam aa.e adab

hai yahī nuqta-e-nazar apnā

baat karte haiñ ham ḳhudā lagtī

aur lahja hai mo'atabar apnā

sher-goī meñ naam hai 'maqbūl'

ye ta.āruf hai muḳhtasar apnā

rah apni na rahbar apna

kaamran kaise ho safar apna

naz kya aarzi Thikane par

shahr apna na koi ghar apna

ab jo hoga wo dekha jaega

aap ka dar hai aur sar apna

hum ko jine ki aarzu hai abhi

kyon hai mayus chaaragar apna

phir nai manzilen talashte hain

KHatm hota nahin safar apna

log hote hain mustafid to hon

hum nahin bechte hunar apna

nau-e-insan ke kaam aae adab

hai yahi nuqta-e-nazar apna

baat karte hain hum KHuda lagti

aur lahja hai mo'atabar apna

sher-goi mein nam hai 'maqbul'

ye taaruf hai muKHtasar apna