rah-e-hayat garche hai dushwar-tar chalo

rāh-e-hayāt garche hai dushvār-tar chalo

har ik qadam banāte na.ī rah-guzar chalo

hogā kahīñ to ḳhatm sarāboñ kā silsila

āḳhir kabhī to aa.egī manzil nazar chalo

chashm-e-ḳhirad se dekh ke raftār vaqt kī

hālāt par rakhe hue apnī nazar chalo

ye zaḳhm-hā-e-dil bhī 'ināyat unhī kī hai

ab un ko kyā dikhā.eñ ye zaḳhm-e-jigar chalo

zulmāt-e-ġham ke baa'd hai ḳhushiyoñ kī raushnī

sahrā-e-shab ko paar karo tā-sahar chalo

'naġhmī' dayār-e-sarvar-e-kaunain hai yahāñ

har ik qadam jhukā.e jabīñ chashm-e-tar chalo

rah-e-hayat garche hai dushwar-tar chalo

har ek qadam banate nai rah-guzar chalo

hoga kahin to KHatm sarabon ka silsila

aaKHir kabhi to aaegi manzil nazar chalo

chashm-e-KHirad se dekh ke raftar waqt ki

haalat par rakhe hue apni nazar chalo

ye zaKHm-ha-e-dil bhi 'inayat unhi ki hai

ab un ko kya dikhaen ye zaKHm-e-jigar chalo

zulmat-e-gham ke ba'd hai KHushiyon ki raushni

sahra-e-shab ko par karo ta-sahar chalo

'naghmi' dayar-e-sarwar-e-kaunain hai yahan

har ek qadam jhukae jabin chashm-e-tar chalo