rah-e-ulfat mein nikal aaega hasil koi

rāh-e-ulfat meñ nikal aa.egā hāsil koī

ḳhatm manzil na ho aisī nahīñ manzil koī

rang ulfat kā jamānā nahīñ mushkil koī

dekh le kaash mirā ḳhūn-e-rag-e-dil koī

mauj-e-dariyā-e-mohabbat kā yahī matlab hai

lutf ke saath na Thahre lab-e-sāhil koī

sab isī fikr meñ din-rāt rahā karte haiñ

marne jiine kā batā de hameñ hāsil koī

duur ḳhud ho ga.ī tārīkī-e-ġhurbat mujh se

kyoñ jalātā hai charāġh ab sar-e-manzil koī

aur jiine kī tamanna nahīñ marne detī

ham samajhte the ki marnā nahīñ mushkil koī

dil ko ab aane lagā qatl-gah-e-nāz meñ lutf

aur bismil kare ai hazrat-e-'bismil' koī

rah-e-ulfat mein nikal aaega hasil koi

KHatm manzil na ho aisi nahin manzil koi

rang ulfat ka jamana nahin mushkil koi

dekh le kash mera KHun-e-rag-e-dil koi

mauj-e-dariya-e-mohabbat ka yahi matlab hai

lutf ke sath na Thahre lab-e-sahil koi

sab isi fikr mein din-raat raha karte hain

marne jine ka bata de hamein hasil koi

dur KHud ho gai tariki-e-ghurbat mujh se

kyon jalata hai charagh ab sar-e-manzil koi

aur jine ki tamanna nahin marne deti

hum samajhte the ki marna nahin mushkil koi

dil ko ab aane laga qatl-gah-e-naz mein lutf

aur bismil kare ai hazrat-e-'bismil' koi