rah-e-wafa mein saya-e-diwar-o-dar bhi hai

rāh-e-vafā meñ sāya-e-dīvār-o-dar bhī hai

lekin usī pe jaan se jaane kā Dar bhī hai

vaqfa hai zindagī to faqat chand roz kā

phir shahr-e-rañg-o-bū kī taraf ik safar bhī hai

raushan rakho charāġh lahū se tamām shab

har raat ke nasīb meñ āḳhir sahar bhī hai

kirdār dekhne kī rivāyat nahīñ rahī

ab aadmī ye dekhtā hai māl-o-zar bhī hai

sun to rahe ho baat yuuñ vaa.iz kī ġhaur se

lekin yaqīn us kī kisī baat par bhī hai

dāmān-e-gul-ruḳhāñ kī tamannā bhī dosto

kitnā hasīn ḳhvāb hai tum ko ḳhabar bhī hai

merā bayān-e-shauq bhalā rā.egāñ ho kyuuñ

tahrīr meñ nihāñ mirā ḳhūn-e-jigar bhī hai

yuuñ to koī aziiz haiñ aur dost bhī magar

'shāyān' ye batāo koī mo'atabar bhī hai

rah-e-wafa mein saya-e-diwar-o-dar bhi hai

lekin usi pe jaan se jaane ka Dar bhi hai

waqfa hai zindagi to faqat chand roz ka

phir shahr-e-rang-o-bu ki taraf ek safar bhi hai

raushan rakho charagh lahu se tamam shab

har raat ke nasib mein aaKHir sahar bhi hai

kirdar dekhne ki riwayat nahin rahi

ab aadmi ye dekhta hai mal-o-zar bhi hai

sun to rahe ho baat yun waiz ki ghaur se

lekin yaqin us ki kisi baat par bhi hai

daman-e-gul-ruKHan ki tamanna bhi dosto

kitna hasin KHwab hai tum ko KHabar bhi hai

mera bayan-e-shauq bhala raegan ho kyun

tahrir mein nihan mera KHun-e-jigar bhi hai

yun to koi aziz hain aur dost bhi magar

'shayan' ye batao koi mo'atabar bhi hai