rah jis ne chali ghafilon ki tarah

raah jis ne chalī ġhāfiloñ kī tarah

qatl bhī vo huā buz-diloñ kī tarah

terī yādeñ tasavvur ko jab mil ga.iiñ

merī ḳhalvat sajī mahfiloñ kī tarah

DhūñDte haiñ sarāboñ meñ kyā tishna-lab

dasht hotā nahīñ sāhiloñ kī tarah

mom ban kar vo hargiz pighalte nahīñ

saḳhtiyoñ meñ jo dil haiñ siloñ kī tarah

roġhan iḳhlās kā rang laane lagā

maiñ nichoḌā gayā jab tiloñ kī tarah

ye hai sach terī furqat ne mohlat na dī

shab guzārī magar vāsiloñ kī tarah

sar meñ saudā-e-sar ho agar jān-e-man

mushkileñ bhī nahīñ mushkiloñ kī tarah

kuchh javāb ahl-e-dil ke savāloñ kā deñ

baat karte haiñ jo āqiloñ kī tarah

qurbat un kī fareb-e-safar de ga.ī

duur se jo lageñ manziloñ kī tarah

ik muqaddas sahīfa mirī shā.erī

jis ko paḌhte ho tum noveloñ kī tarah

mere afkār 'nādim' tan-āsāñ nahīñ

yuuñ to lagtā huuñ maiñ kāhiloñ kī tarah

rah jis ne chali ghafilon ki tarah

qatl bhi wo hua buz-dilon ki tarah

teri yaaden tasawwur ko jab mil gain

meri KHalwat saji mahfilon ki tarah

DhunDte hain sarabon mein kya tishna-lab

dasht hota nahin sahilon ki tarah

mom ban kar wo hargiz pighalte nahin

saKHtiyon mein jo dil hain silon ki tarah

roghan iKHlas ka rang lane laga

main nichoDa gaya jab tilon ki tarah

ye hai sach teri furqat ne mohlat na di

shab guzari magar wasilon ki tarah

sar mein sauda-e-sar ho agar jaan-e-man

mushkilen bhi nahin mushkilon ki tarah

kuchh jawab ahl-e-dil ke sawalon ka den

baat karte hain jo aaqilon ki tarah

qurbat un ki fareb-e-safar de gai

dur se jo lagen manzilon ki tarah

ek muqaddas sahifa meri shaeri

jis ko paDhte ho tum nowelon ki tarah

mere afkar 'nadim' tan-asan nahin

yun to lagta hun main kahilon ki tarah