rah ki dhup se mafar hi nahin

raah kī dhuup se mafar hī nahīñ

ham jahāñ haiñ vahāñ shajar hī nahīñ

yā to mujh meñ koī hunar hī nahīñ

yā koī sāhib-e-nazar hī nahīñ

huuñ ye kis tīrgī ke zindāñ meñ

raushnī kā jahāñ guzar hī nahīñ

koī Duube koī sadā ubhre

shor-e-dariyā pe kuchh asar hī nahīñ

ḳhushk patte uḌā rahī hai havā

ab koī phuul shāḳh par hī nahīñ

guftugū zaḳhm bhī hai marham bhī

lafz shabnam bhī haiñ sharar hī nahīñ

kyā kisī se ham ustuvār kareñ

rishta-e-jāñ ki mo'atabar hī nahīñ

rah ki dhup se mafar hi nahin

hum jahan hain wahan shajar hi nahin

ya to mujh mein koi hunar hi nahin

ya koi sahib-e-nazar hi nahin

hun ye kis tirgi ke zindan mein

raushni ka jahan guzar hi nahin

koi Dube koi sada ubhre

shor-e-dariya pe kuchh asar hi nahin

KHushk patte uDa rahi hai hawa

ab koi phul shaKH par hi nahin

guftugu zaKHm bhi hai marham bhi

lafz shabnam bhi hain sharar hi nahin

kya kisi se hum ustuwar karen

rishta-e-jaan ki mo'atabar hi nahin