rah mein jo bhi rukawaT ho haTa dena hai

raah meñ jo bhī rukāvaT ho haTā denā hai

laakh ūñchī sahī dīvār girā denā hai

ham pe us 'ahd kā jo qarz chalā aatā hai

ab ke jaise bhī ho vo qarz chukā denā hai

apnī ġhairat pe bahut zulm kiye haiñ ham ne

ḳhud ko ab apne hī hāthoñ se sazā denā hai

taaki paspā.ī kā imkān hī baaqī na rahe

ek baar aur safīnoñ ko jalā denā hai

ham abhī chup haiñ magar roz-e-hisāb aane do

ham ko mā'lūm hai kyā lenā hai kyā denā hai

bād-e-sarsar se koī aur tavaqqo' be-sūd

us kī fitrat to charāġhoñ ko bujhā denā hai

ab tavaqquf kī zarūrat hai na ḳhush-fahmī kī

fitna-e-jabr ko bar-vaqt dabā denā hai

ham ne sīkhā hai azān-e-saharī se ye usuul

log ḳhvābīda sahī ham ko sadā denā hai

ham ko hālāt ne majbūr kiyā hai varna

ham faqīroñ kā to mā'mūl du'ā denā hai

rah mein jo bhi rukawaT ho haTa dena hai

lakh unchi sahi diwar gira dena hai

hum pe us 'ahd ka jo qarz chala aata hai

ab ke jaise bhi ho wo qarz chuka dena hai

apni ghairat pe bahut zulm kiye hain hum ne

KHud ko ab apne hi hathon se saza dena hai

taki paspai ka imkan hi baqi na rahe

ek bar aur safinon ko jala dena hai

hum abhi chup hain magar roz-e-hisab aane do

hum ko ma'lum hai kya lena hai kya dena hai

baad-e-sarsar se koi aur tawaqqo' be-sud

us ki fitrat to charaghon ko bujha dena hai

ab tawaqquf ki zarurat hai na KHush-fahmi ki

fitna-e-jabr ko bar-waqt daba dena hai

hum ne sikha hai azan-e-sahari se ye usul

log KHwabida sahi hum ko sada dena hai

hum ko haalat ne majbur kiya hai warna

hum faqiron ka to ma'mul du'a dena hai