rah mein paDti thi diwar nahin dekh saka

raah meñ paḌtī thī dīvār nahīñ dekh sakā

maiñ ki is paar thā us paar nahīñ dekh sakā

dekhtā thā jise rozāna kī buniyād pe maiñ

ek do saal se ik baar nahīñ dekh sakā

yaar tū kaise kisī shaḳhs kī jaañ letā hai

maiñ to ik chiḌiyā ko bīmār nahīñ dekh sakā

is pe kyā ġham ki churā.ī haiñ nigāheñ us ne

maiñ bhī to us ko lagātār nahīñ dekh sakā

tū ai dushman mirī hālat ko kahāñ dekhegā

merī jānib to mirā yaar nahīñ dekh sakā

is liye umr se maiñ tujh ko baḌā lagtā huuñ

tū mere hijr kī raftār nahīñ dekh sakā

aisī tartīb se rakkhā thā sajā kar 'dānish'

maal meñ naqs ḳharīdār nahīñ dekh sakā

rah mein paDti thi diwar nahin dekh saka

main ki is par tha us par nahin dekh saka

dekhta tha jise rozana ki buniyaad pe main

ek do sal se ek bar nahin dekh saka

yar tu kaise kisi shaKHs ki jaan leta hai

main to ek chiDiya ko bimar nahin dekh saka

is pe kya gham ki churai hain nigahen us ne

main bhi to us ko lagatar nahin dekh saka

tu ai dushman meri haalat ko kahan dekhega

meri jaanib to mera yar nahin dekh saka

is liye umr se main tujh ko baDa lagta hun

tu mere hijr ki raftar nahin dekh saka

aisi tartib se rakkha tha saja kar 'danish'

mal mein naqs KHaridar nahin dekh saka