rahat-e-jaan hui hai hum pe suKHan-arai

rāhat-e-jāñ huī hai ham pe suḳhan-ārā.ī

jaise bajne lage komal suroñ meñ shahnā.ī

ham se lipTī hai yā lipTe hue haiñ ham is se

kis qadar dekh tirī yaad se hai yakjā.ī

ḳhauf dekhā thā bichhaḌne kā tirī āñkhoñ meñ

aur nazar aa.ī thī dīvār pe ik parchhā.ī

vo bhī hairāñ haiñ udhar ham bhī pareshāñ haiñ idhar

yaad aa.ī hai udhar aur idhar bhī aa.ī

vo jo thī raat meñ tanhā mujhe kar jaatī thī

ab banānī hai mujhe ek na.ī parchhā.ī

jaañ meñ paivast udāsī hai ka.ī janmoñ kī

maut tak saath nibhā.egī mirī tanhā.ī

ham bahut ḳhush the bahut hañste the nādānī meñ

kar ga.ī hai hameñ vīrān koī dānā.ī

jism jaise bhī hoñ sāyoñ meñ koī aib nahīñ

ek hī rang ke haiñ ek sī hai gahrā.ī

log kahte haiñ kaheñ kis ko hai parvā 'mīrā'

ham ne sar māthe pe rakkhī hai tirī rusvā.ī

rahat-e-jaan hui hai hum pe suKHan-arai

jaise bajne lage komal suron mein shahnai

hum se lipTi hai ya lipTe hue hain hum is se

kis qadar dekh teri yaad se hai yakjai

KHauf dekha tha bichhaDne ka teri aankhon mein

aur nazar aai thi diwar pe ek parchhai

wo bhi hairan hain udhar hum bhi pareshan hain idhar

yaad aai hai udhar aur idhar bhi aai

wo jo thi raat mein tanha mujhe kar jati thi

ab banani hai mujhe ek nai parchhai

jaan mein paiwast udasi hai kai janmon ki

maut tak sath nibhaegi meri tanhai

hum bahut KHush the bahut hanste the nadani mein

kar gai hai hamein viran koi danai

jism jaise bhi hon sayon mein koi aib nahin

ek hi rang ke hain ek si hai gahrai

log kahte hain kahen kis ko hai parwa 'mira'

hum ne sar mathe pe rakkhi hai teri ruswai