rahat-e-kaunain wasl-e-jism-o-jaan samjha tha main

rāhat-e-kaunain vasl-e-jism-o-jāñ samjhā thā maiñ

zindagī ko suud marne ko ziyāñ samjhā thā maiñ

ik jamāl-e-ġhair-fānī kī vo detī thī ḳhabar

apnī hastī ko faqat vahm-o-gumāñ samjhā thā maiñ

dāġh-e-dil ko dekh kar sharmā ga.e jannat ke phuul

haif us ko ik matā-e-rā.egāñ samjhā thā maiñ

us ke andāz-e-bayāñ par guftugū qurbāñ huī

apnī ḳhāmoshī ko yā-rab be-zabāñ samjhā thā maiñ

kuchh bagūle raqs karte aa.e sahrā meñ nazar

gard ko un kī ġhubār-e-kārvāñ samjhā thā maiñ

phuul thā ḳhūnīñ-jigar kāvish se nok-e-ḳhār kī

us ko ik jām-e-sharāb-e-arġhavāñ samjhā thā maiñ

umr-bhar khātā rahā afsos daulat kā fareb

jism ke ārām ko ārām-e-jāñ samjhā thā maiñ

shiddat-e-ranj-o-alam thī zāmin-e-lutf-e-hayāt

vā.e-nādānī ki is ko jāñ-sitāñ samjhā thā maiñ

rahat-e-kaunain wasl-e-jism-o-jaan samjha tha main

zindagi ko sud marne ko ziyan samjha tha main

ek jamal-e-ghair-fani ki wo deti thi KHabar

apni hasti ko faqat wahm-o-guman samjha tha main

dagh-e-dil ko dekh kar sharma gae jannat ke phul

haif us ko ek mata-e-raegan samjha tha main

us ke andaz-e-bayan par guftugu qurban hui

apni KHamoshi ko ya-rab be-zaban samjha tha main

kuchh bagule raqs karte aae sahra mein nazar

gard ko un ki ghubar-e-karwan samjha tha main

phul tha KHunin-jigar kawish se nok-e-KHar ki

us ko ek jam-e-sharab-e-arghawan samjha tha main

umr-bhar khata raha afsos daulat ka fareb

jism ke aaram ko aaram-e-jaan samjha tha main

shiddat-e-ranj-o-alam thi zamin-e-lutf-e-hayat

wae-nadani ki is ko jaan-sitan samjha tha main