rahat-e-zist ke saman kahan milte hain

rāhat-e-zīst ke sāmān kahāñ milte haiñ

aadmī milte haiñ insān kahāñ milte haiñ

zindagī shauq-e-musalsal meñ Dhalī jaatī hai

mere ḳhvāboñ ke paristān kahāñ milte haiñ

aao sailāb o havādis se guzarnā sīkho

log parvarda-e-tūfān kahāñ milte haiñ

jo mire kufr-e-mohabbat ko gavārā kar leñ

is qadar sāhib-e-īmān kahāñ milte haiñ

ham ko takmīl-e-imārat meñ ġhanīmat jaano

ham se majbūr-o-pareshān kahāñ milte haiñ

sāhabo sham.a zamīroñ kī bujhā kar aao

yuuñ vazārat ke qalamdān kahāñ milte haiñ

ġham-gusāroñ kī rivāyāt-e-vafā meñ 'afsūñ'

dil kī taskīn ke sāmān kahāñ milte haiñ

rahat-e-zist ke saman kahan milte hain

aadmi milte hain insan kahan milte hain

zindagi shauq-e-musalsal mein Dhali jati hai

mere KHwabon ke paristan kahan milte hain

aao sailab o hawadis se guzarna sikho

log parwarda-e-tufan kahan milte hain

jo mere kufr-e-mohabbat ko gawara kar len

is qadar sahib-e-iman kahan milte hain

hum ko takmil-e-imarat mein ghanimat jaano

hum se majbur-o-pareshan kahan milte hain

sahabo shama zamiron ki bujha kar aao

yun wazarat ke qalamdan kahan milte hain

gham-gusaron ki riwayat-e-wafa mein 'afsun'

dil ki taskin ke saman kahan milte hain