rahat ka zamane mein saman nahin milta

rāhat kā zamāne meñ sāmān nahīñ miltā

insān kī bastī meñ insān nahīñ miltā

kuchh aisī havā badlī afsos zamāne kī

ehsān ke badle meñ ehsān nahīñ miltā

is kār-gah-e-hastī kā itnā fasāna hai

ho nafs jahāñ baaqī irfān nahīñ miltā

aa.iin bahut achchhā da.ave bhī hasīñ lekin

ulfat kā hameñ phir bhī farmān nahīñ miltā

shaddād kī jannat haiñ jamhūr ke sab va.ade

ab dard kā apne kuchh darmāñ nahīñ miltā

kyā baḌh ke nahīñ chūme haiñ dār-o-rasan ham ne

phir bhī hameñ izzat kā īqān nahīñ miltā

go nisf sadī biitī āzādi-e-kāmil ko

rāhat kā 'ġhubār' ab tak sāmān nahīñ miltā

rahat ka zamane mein saman nahin milta

insan ki basti mein insan nahin milta

kuchh aisi hawa badli afsos zamane ki

ehsan ke badle mein ehsan nahin milta

is kar-gah-e-hasti ka itna fasana hai

ho nafs jahan baqi irfan nahin milta

aain bahut achchha dawe bhi hasin lekin

ulfat ka hamein phir bhi farman nahin milta

shaddad ki jannat hain jamhur ke sab wade

ab dard ka apne kuchh darman nahin milta

kya baDh ke nahin chume hain dar-o-rasan hum ne

phir bhi hamein izzat ka iqan nahin milta

go nisf sadi biti aazadi-e-kaamil ko

rahat ka 'ghubar' ab tak saman nahin milta