rahen viran to ujDe hue kuchh ghar honge

rāheñ vīrān to ujḌe hue kuchh ghar hoñge

dasht se baḌh ke mire shahr ke manzar hoñge

yuuñ hī ta.amīr agar hote rahe shīsh-mahal

ek din shahr kī har raah meñ patthar hoñge

dasht meñ ham ne ye maanā ki mileñge vahshī

shahr vāloñ se to har haal meñ behtar hoñge

kyā ḳhabar thī ki gulāboñ se hasīñ hoñToñ par

zahr meñ Duube hue tanz ke nashtar hoñge

tere insāf kā me.aar yahī kahtā hai

jitne ilzām bhī hoñge vo mire sar hoñge

hāl-e-dil kahne se pahle hameñ mālūm na thā

terī āñkhoñ meñ bhī ashkoñ ke samundar hoñge

rahen viran to ujDe hue kuchh ghar honge

dasht se baDh ke mere shahr ke manzar honge

yun hi tamir agar hote rahe shish-mahal

ek din shahr ki har rah mein patthar honge

dasht mein hum ne ye mana ki milenge wahshi

shahr walon se to har haal mein behtar honge

kya KHabar thi ki gulabon se hasin honTon par

zahr mein Dube hue tanz ke nashtar honge

tere insaf ka mear yahi kahta hai

jitne ilzam bhi honge wo mere sar honge

haal-e-dil kahne se pahle hamein malum na tha

teri aankhon mein bhi ashkon ke samundar honge