rahi koi nahin hai koi rahnuma nahin

raahī koī nahīñ hai koī rahnumā nahīñ

jis raah par chalā huuñ kahīñ naqsh-e-pā nahīñ

sajde mire zamān-o-makāñ se haiñ be-niyāz

ka.aba se but-kade se koī rābta nahīñ

dil hai kahīñ ḳhayāl kahīñ hai nazar kahīñ

ai shaiḳh terā ek bhī sajda ravā nahīñ

be-kaif sī hai raat to be-lutf sā hai din

sach to ye hai ki jiine meñ kuchh bhī mazā nahīñ

shām-o-sahar bahār-o-ḳhizāñ ranj-o-imbisāt

koī bhī inqalāb kī zad se bachā nahīñ

tanqīd kar rahe haiñ vo ash.ār par 'zamīr'

sher-o-suḳhan se jin ko koī vāsta nahīñ

rahi koi nahin hai koi rahnuma nahin

jis rah par chala hun kahin naqsh-e-pa nahin

sajde mere zaman-o-makan se hain be-niyaz

kaba se but-kade se koi rabta nahin

dil hai kahin KHayal kahin hai nazar kahin

ai shaiKH tera ek bhi sajda rawa nahin

be-kaif si hai raat to be-lutf sa hai din

sach to ye hai ki jine mein kuchh bhi maza nahin

sham-o-sahar bahaar-o-KHizan ranj-o-imbisat

koi bhi inqalab ki zad se bacha nahin

tanqid kar rahe hain wo ashaar par 'zamir'

sher-o-suKHan se jin ko koi wasta nahin