rahon mein kuchh aise bhi maqamat milenge

rāhoñ meñ kuchh aise bhī maqāmāt mileñge

qadmoñ ke jahāñ mere nishānāt mileñge

ye raat to guzrī hai baḌe kaif meñ lekin

zinda rahe ai dost to kal raat mileñge

pī to ga.e tum ashk mujhe dekh ke lekin

ruḳhsār pe kuchh ab bhī nishānāt mileñge

mai-ḳhāna ho masjid ho kalīsā ho ki mandir

in meñ bhī to kuchh vaqf-e-ḳharābāt mileñge

bāzār meñ bechoge jo tum qaum kī mīrās

phir tum ko bhī tamġhāt-o-ḳhitābāt mileñge

tārīḳh ke khāte meñ mire naam pe tum ko

sadiyoñ ke chukāne ko hisābāt mileñge

āñkhoñ ko paḌho chehre kī hālat pe na jaao

nafrat meñ bhī ulfat ke payāmāt mileñge

chehroñ ke javābāt to tum de chuke paḌh kar

āñkhoñ meñ abhī aur savālāt mileñge

dekhūñgā kahāñ tak vo bhulāte haiñ mujhe 'fauq'

har saañs meñ un ke mire jazbāt mileñge

rahon mein kuchh aise bhi maqamat milenge

qadmon ke jahan mere nishanat milenge

ye raat to guzri hai baDe kaif mein lekin

zinda rahe ai dost to kal raat milenge

pi to gae tum ashk mujhe dekh ke lekin

ruKHsar pe kuchh ab bhi nishanat milenge

mai-KHana ho masjid ho kalisa ho ki mandir

in mein bhi to kuchh waqf-e-KHarabaat milenge

bazar mein bechoge jo tum qaum ki miras

phir tum ko bhi tamghat-o-KHitabaat milenge

tariKH ke khate mein mere nam pe tum ko

sadiyon ke chukane ko hisabaat milenge

aankhon ko paDho chehre ki haalat pe na jao

nafrat mein bhi ulfat ke payamat milenge

chehron ke jawabaat to tum de chuke paDh kar

aankhon mein abhi aur sawalat milenge

dekhunga kahan tak wo bhulate hain mujhe 'fauq'

har sans mein un ke mere jazbaat milenge