ras aai na mujhe anjuman-arai bhi

raas aa.ī na mujhe anjuman-ārā.ī bhī

āfat-e-jān banī haa.e shanāsā.ī bhī

dushmanoñ kī mire auqāt kahāñ thī itnī

sāzish-e-qatl meñ shāmil thā mirā bhaa.ī bhī

aañkh andhī thī zamāne se yahāñ logoñ kī

mar ga.ī zer-e-dahan quvvat-e-goyā.ī bhī

tujh se nisbat ho koī sañg-e-malāmat kī agar

mujh ko pyārī hai tire shahr meñ rusvā.ī bhī

kashtī-e-zīst jahāñ Duub rahī thī merī

mere apne the vahāñ log tamāshā.ī bhī

kar diyā mujh ko masā.il ne abhī se būḌhā

vaqt ne ruḳh se mire chhīn lī ra.anā.ī bhī

muflisī jin ke muqaddar meñ likhī hai 'shamsī'

un ke ghar bajtī nahīñ hai kabhī shahnā.ī bhī

ras aai na mujhe anjuman-arai bhi

aafat-e-jaan bani hae shanasai bhi

dushmanon ki mere auqat kahan thi itni

sazish-e-qatl mein shamil tha mera bhai bhi

aankh andhi thi zamane se yahan logon ki

mar gai zer-e-dahan quwwat-e-goyai bhi

tujh se nisbat ho koi sang-e-malamat ki agar

mujh ko pyari hai tere shahr mein ruswai bhi

kashti-e-zist jahan Dub rahi thi meri

mere apne the wahan log tamashai bhi

kar diya mujh ko masail ne abhi se buDha

waqt ne ruKH se mere chhin li ranai bhi

muflisi jin ke muqaddar mein likhi hai 'shamsi'

un ke ghar bajti nahin hai kabhi shahnai bhi