ras aaya hai mujhe wahshat mein mar jaana mera

raas aayā hai mujhe vahshat meñ mar jaanā mirā

vo mujhe ro.e ye kah kar haa.e dīvānā mirā

ġhair ko saaqī ne jab bhar kar diyā jām-e-sharāb

āñ.suoñ se ho gayā labrez paimānā mirā

mere rone par vo un kā muskurānā baar baar

aur balā.eñ le ke vo qadmoñ pe gir jaanā mirā

hazrat-e-nāseh kī bāteñ maiñ samajhtā hī nahīñ

nā samajh haiñ dil-lagī samjhe haiñ samjhānā mirā

ai 'rasā' vo bhī sharīk-e-mahfil-e-mātam hue

ḳhizar bhī marte haiñ jis par vo hai mar jaanā mirā

ras aaya hai mujhe wahshat mein mar jaana mera

wo mujhe roe ye kah kar hae diwana mera

ghair ko saqi ne jab bhar kar diya jam-e-sharab

aansuon se ho gaya labrez paimana mera

mere rone par wo un ka muskurana bar bar

aur balaen le ke wo qadmon pe gir jaana mera

hazrat-e-naseh ki baaten main samajhta hi nahin

na samajh hain dil-lagi samjhe hain samjhana mera

ai 'rasa' wo bhi sharik-e-mahfil-e-matam hue

KHizar bhi marte hain jis par wo hai mar jaana mera