rasta ab rokne wala ye mera kaun hai

rāsta ab rokne vaalā ye merā kaun hai

vo nahīñ hai dūsrā phir us ke jaisā kaun hai

kaun hai māmūr merī muḳhbirī par in dinoñ

merī ḳhātir ye pas-e-dīvār Thahrā kaun hai

kaun mere rū-ba-rū hai ā.ina-dar-ā.ina

mere pīchhe chal rahā hai jo ye saaya kaun hai

jin se thī pahchān vo sab jā base haiñ duur des

merī bastī meñ rahā merā shanāsā kaun hai

tum se vābasta tumhāre chāhne vaale bahut

pūchhtā huuñ maiñ batāo mere jaisā kaun hai

har qadam har saañs par mazbūt hai us kī giraft

mere pīchhe ye paḌā mere ḳhudāyā kaun hai

TuuT kar bikhrā hai mere haath se merā vajūd

is jahāñ meñ mujh sā mahrūm-e-tamannā kaun hai

ḳhuun ke rishte bhī jhūTe ho ga.e sābit 'matīn'

kis ko maiñ apnā kahūñ merā shanāsā kaun hai

rasta ab rokne wala ye mera kaun hai

wo nahin hai dusra phir us ke jaisa kaun hai

kaun hai mamur meri muKHbiri par in dinon

meri KHatir ye pas-e-diwar Thahra kaun hai

kaun mere ru-ba-ru hai aaina-dar-aina

mere pichhe chal raha hai jo ye saya kaun hai

jin se thi pahchan wo sab ja base hain dur des

meri basti mein raha mera shanasa kaun hai

tum se wabasta tumhaare chahne wale bahut

puchhta hun main batao mere jaisa kaun hai

har qadam har sans par mazbut hai us ki giraft

mere pichhe ye paDa mere KHudaya kaun hai

TuT kar bikhra hai mere hath se mera wajud

is jahan mein mujh sa mahrum-e-tamanna kaun hai

KHun ke rishte bhi jhuTe ho gae sabit 'matin'

kis ko main apna kahun mera shanasa kaun hai