rasta chahiye dariya ki farawani ko

rāsta chāhiye dariyā kī farāvānī ko

hai agar zo.am to le rok le tuġhyānī ko

aa.ina TuuT gayā shakl ke zarre bikhre

kyā chhupātā hai ab is dasht kī vīrānī ko

āb-yārī jo huī hai to shajar bhī hoñge

tū ne samjhā thā ġhalat ḳhuun kī arzānī ko

le ye tūfāñ tirī dahlīz tak aa pahuñchā hai

barf samjhā thā usī Thahre hue paanī ko

suraḳh-rū huuñ ki maiñ is aag se kundan niklā

sho.ala-e-ḳhūñ ne ujālā mirī peshānī ko

maiñ utar aayā huuñ us paar jahāñ maut nahīñ

mil gayā jism-numā ruuh kī uryānī ko

vāqi.a aam huā dhuup kī kirnoñ kī tarah

dekh le haath lagā kar mirī tābānī ko

phir na.ī fasl kā mausam hai duā kar 'shāhid'

abr sairāb kare ḳhitta-e-bārānī ko

rasta chahiye dariya ki farawani ko

hai agar zoam to le rok le tughyani ko

aaina TuT gaya shakl ke zarre bikhre

kya chhupata hai ab is dasht ki virani ko

aab-yari jo hui hai to shajar bhi honge

tu ne samjha tha ghalat KHun ki arzani ko

le ye tufan teri dahliz tak aa pahuncha hai

barf samjha tha usi Thahre hue pani ko

suraKH-ru hun ki main is aag se kundan nikla

shoala-e-KHun ne ujala meri peshani ko

main utar aaya hun us par jahan maut nahin

mil gaya jism-numa ruh ki uryani ko

waqia aam hua dhup ki kirnon ki tarah

dekh le hath laga kar meri tabani ko

phir nai fasl ka mausam hai dua kar 'shahid'

abr sairab kare KHitta-e-barani ko