raste hamwar karte hi gae

rāste hamvār karte hī ga.e

manzileñ mismār karte hī ga.e

ghar ko vīrāna banā Daalā magar

dasht ko gulzār karte hī ga.e

sahn-e-dil kholā rafīqoñ ke liye

vo use bāzār karte hī ga.e

nuur ke aage kiyā āñkhoñ ko band

aur phir dīdār karte hī ga.e

sab se poshīda rakhā apnā hunar

bas use tayyār karte hī ga.e

daad dene par vo āmāda the aur

'zarra' ham inkār karte hī ga.e

raste hamwar karte hi gae

manzilen mismar karte hi gae

ghar ko virana bana Dala magar

dasht ko gulzar karte hi gae

sahn-e-dil khola rafiqon ke liye

wo use bazar karte hi gae

nur ke aage kiya aankhon ko band

aur phir didar karte hi gae

sab se poshida rakha apna hunar

bas use tayyar karte hi gae

dad dene par wo aamada the aur

'zarra' hum inkar karte hi gae