raat bezar sa ghar se jo main tanha nikla

raat bezār sā ghar se jo maiñ tanhā niklā

chāñd bhī jaise mere ġham kā shanāsā niklā

sar-ba-sar Duub gayā raat ke sannāTe meñ

chāñdnī jis ko maiñ samjhā thā vo dariyā niklā

duur se aa.ī galī meñ kahīñ qadmoñ kī sadā

apnā ghar chhoḌ ke mujh sā koī tanhā niklā

soī thī chāñdnī pattoñ se Dhakī saḌkoñ par

ek jhoñkā sar-e-shab ḳhaak uḌātā niklā

sāmne ghar ke tire koī khaḌā thā jaise

vahm apnā tirī dīvār kā saayā niklā

chāñdnī rāh-e-mulāqāt meñ dīvār banī

chāñd bhī jaise tirā chāhne vaalā niklā

raat ke moḌ pe kaun ā.ina-bardār milā

jis ko samjhā thā tirī yaad zamāna niklā

raat bhar mauj-e-havā se tirī ḳhushbū aa.ī

chāñd-tāroñ meñ tirā naqsh-e-kaf-e-pā niklā

is bhare shahr meñ ham chāk-e-garebāñ Thahre

jis ko dekhā vahī sargarm-e-tamāshā niklā

ham to is dil hī ko samjhe the bayābāñ 'ḳhāvar'

chāñd bhī duur tak ik rañg kā sahrā niklā

raat bezar sa ghar se jo main tanha nikla

chand bhi jaise mere gham ka shanasa nikla

sar-ba-sar Dub gaya raat ke sannaTe mein

chandni jis ko main samjha tha wo dariya nikla

dur se aai gali mein kahin qadmon ki sada

apna ghar chhoD ke mujh sa koi tanha nikla

soi thi chandni patton se Dhaki saDkon par

ek jhonka sar-e-shab KHak uData nikla

samne ghar ke tere koi khaDa tha jaise

wahm apna teri diwar ka saya nikla

chandni rah-e-mulaqat mein diwar bani

chand bhi jaise tera chahne wala nikla

raat ke moD pe kaun aaina-bardar mila

jis ko samjha tha teri yaad zamana nikla

raat bhar mauj-e-hawa se teri KHushbu aai

chand-taron mein tera naqsh-e-kaf-e-pa nikla

is bhare shahr mein hum chaak-e-gareban Thahre

jis ko dekha wahi sargarm-e-tamasha nikla

hum to is dil hi ko samjhe the bayaban 'KHawar'

chand bhi dur tak ek rang ka sahra nikla