raat bhar main KHwab ban kar uski wahshat dekhti

raat bhar maiñ ḳhvāb ban kar us kī vahshat dekhtī

kaif-eXulfat meñ jo muzmar hai vo shiddat dekhtī

ik sulagtī aag ban kar rah gayā merā vajūd

aag jal kar raakh ho jaatī to hiddat dekhtī

mo.ajiza kuchh yuuñ huā yūsuf zuleḳhā mil ga.e

mujh ko merā pyaar mil jaatā to qudrat dekhtī

bad-kalāmī par vo nādim hai mujhe hotā yaqīñ

us kī āñkhoñ meñ agar ik baar ḳhiffat dekhtī

mere aañsū us ke lab chhū kar mujhe āvāz deñ

kaash mahrūmī merī itnī to farhat dekhtī

mujh ko lagtā ḳhvāb jaise sab haqīqat ban ga.e

kuchh dinoñ maiñ paas rah kar us kī ulfat dekhtī

kaash maiñ ik baar miltī us se pahle kī tarah

aur phir us se bichhaḌ jaane kī lazzat dekhtī

hārne kī aarzū meñ pyaar kā rasta chunā

jītne kī aarzū hotī to 'nusrat' dekhtī

raat bhar main KHwab ban kar us ki wahshat dekhti

kaif-eXulfat mein jo muzmar hai wo shiddat dekhti

ek sulagti aag ban kar rah gaya mera wajud

aag jal kar rakh ho jati to hiddat dekhti

moajiza kuchh yun hua yusuf zuleKHa mil gae

mujh ko mera pyar mil jata to qudrat dekhti

bad-kalami par wo nadim hai mujhe hota yaqin

us ki aankhon mein agar ek bar KHiffat dekhti

mere aansu us ke lab chhu kar mujhe aawaz den

kash mahrumi meri itni to farhat dekhti

mujh ko lagta KHwab jaise sab haqiqat ban gae

kuchh dinon main pas rah kar us ki ulfat dekhti

kash main ek bar milti us se pahle ki tarah

aur phir us se bichhaD jaane ki lazzat dekhti

haarne ki aarzu mein pyar ka rasta chuna

jitne ki aarzu hoti to 'nusrat' dekhti