raat din gaDhte rahe yunhi fasane kitne

raat din gaḌhte rahe yūñhī fasāne kitne

dil ko bahlāne ko DhūñDe haiñ bahāne kitne

ḳhāk-e-parvāna uḌī sham-e-shabistāñ bhī bujhī

rah-e-ulfat meñ miTe mujh se na jaane kitne

sarguzasht-e-dil-e-barbād sunāne ke liye

sāz-e-ayyām pe bajte haiñ tarāne kitne

aarzū ḳhāk-basar aur mohabbat barbād

kishvar-e-husn meñ ujḌe haiñ gharāne kitne

marg-e-amboh kabhī shām-e-ġharībāñ hai kabhī

zindagī meñ haiñ abhī jashn manāne kitne

kabhī afsurda tabassum kabhī be-vaj.h malāl

ruup dikhlā.e tire nāz-o-adā ne kitne

ek ham the ki rahe vasl se mahrūm 'zubair'

zulf-o-gesū se mahakte rahe shāne kitne

raat din gaDhte rahe yunhi fasane kitne

dil ko bahlane ko DhunDe hain bahane kitne

KHak-e-parwana uDi sham-e-shabistan bhi bujhi

rah-e-ulfat mein miTe mujh se na jaane kitne

sarguzasht-e-dil-e-barbaad sunane ke liye

saz-e-ayyam pe bajte hain tarane kitne

aarzu KHak-basar aur mohabbat barbaad

kishwar-e-husn mein ujDe hain gharane kitne

marg-e-amboh kabhi sham-e-ghariban hai kabhi

zindagi mein hain abhi jashn manane kitne

kabhi afsurda tabassum kabhi be-wajh malal

rup dikhlae tere naz-o-ada ne kitne

ek hum the ki rahe wasl se mahrum 'zubair'

zulf-o-gesu se mahakte rahe shane kitne